Thursday, February 7, 2013

ಕಮಲಹಾಸನ್ ಅವರ ವಿಶ್ವ ವಿ-ರೂಪಂ...



  ಬಿ. ಎಂ. ಬಶೀರ್
‘ನೀವು ಒಂದೋ ನಮ್ಮ ಜೊತೆಗೆ, ಇಲ್ಲವೇ ಭಯೋತ್ಪಾದಕರ ಜೊತೆಗೆ’ ಸೆಪ್ಟಂಬರ್ 11ರ ದಾಳಿಯ ಬಳಿಕ ಅಮೆರಿಕದ ಅಂದಿನ ಅಧ್ಯಕ್ಷ ಜಾರ್ಜ್‌ಬುಶ್ ವಿಶ್ವದ ಮುಂದಿಟ್ಟ ಎರಡು ಆಯ್ಕೆಗಳು. ಅಮೆರಿಕದ ಜೊತೆಗೆ ನಿಲ್ಲದವರೆಲ್ಲ ಪರೋಕ್ಷವಾಗಿ ಭಯೋತ್ಪಾದಕರ ಜೊತೆಗೆ ನಿಂತಿದ್ದಾರೆಂದೇ ಅರ್ಥ ಎನ್ನುವ ಫತ್ವಾವನ್ನು ಜಾರ್ಜ್ ಬುಶ್ ಹೊರಡಿಸಿದ್ದರು. ಈ ಫತ್ವಾಕ್ಕೆ ತಲೆಬಾಗಿರುವ ಕಮಲಹಾಸನ್ ತನ್ನ ವಿಶ್ವವನ್ನು ಅಮೆರಿಕದ ಜೊತೆಗೆ ಜೋಡಿಸಿಕೊಂಡು, ವಿಶ್ವರೂಪಂನ್ನು ಬಿಡಿಸಿದ್ದಾರೆ. ಇದು ವಿವಾದವಾಗಬೇಕಾದ, ಚರ್ಚೆಯಾಗಬೇಕಾದ ಚಿತ್ರವೇ ಅಲ್ಲ.
ಅಮೆರಿಕದ ಕಣ್ಣಲ್ಲಿ ಕಮಲಹಾಸನ್ ಅಫ್ಘಾನಿಸ್ತಾನವನ್ನು ನೋಡಿದ್ದಾರೆ ಎನ್ನುವುದು ಯಾವ ಕಾರಣಕ್ಕೂ ಅಪರಾಧವಲ್ಲ. ಹಾಗೆ ನೋಡುವುದು ಜಗತ್ತಿನ ‘ಮುಖ್ಯವಾಹಿನಿ’ ಎಂದು ಸ್ವಯಂ ಘೋಷಿಸಿಕೊಂಡವರ ಹಕ್ಕು. ಇಡೀ ಚಿತ್ರ, ‘ಅಮೆರಿಕ ಭಯೋತ್ಪಾದನೆಯ ವಿರುದ್ಧ ಹೋರಾಡುತ್ತದೆ’ ಮತ್ತು ‘ಅಮೆರಿಕದ ವಿರುದ್ಧ ಹೋರಾಡುವವರು ಭಯೋತ್ಪಾದಕರು’ ಎನ್ನುವುದನ್ನು ಸಾಧಿಸುವುದಕ್ಕೆ ಪ್ರಯತ್ನಿಸುತ್ತದೆ. ಜಗತ್ತಿನ ಇಂದಿನ ರಾಜಕೀಯ ವಿದ್ಯಮಾನವನ್ನು ಕಮಲಹಾಸನ್ ಹೇಗೆ ಅರ್ಥಮಾಡಿ ಕೊಂಡಿ ದ್ದಾರೆ ಎನ್ನುವುದನ್ನಷ್ಟೇ ಈ ಚಿತ್ರದಲ್ಲಿ ನೋಡ ಬಹುದು. ಅದು ಅವರ ಅಭಿವ್ಯಕ್ತಿ ಸ್ವಾತಂತ್ರ. ನಾವದನ್ನು ಒಪ್ಪಲೇಬೇಕು. ಒಬ್ಬ ಸೃಜನಶೀಲ ಕಲಾವಿದನಿಗೆ ವಿಶ್ವ ರಾಜಕೀಯದ ಕುರಿತಂತೆ ಅಜ್ಞಾನಿಯಾಗುವುದಕ್ಕೆ ಎಲ್ಲ ಹಕ್ಕೂ ಇದೆ. ಆ ಹಕ್ಕನ್ನು ನಾವು ಮನ್ನಿಸಲೇಬೇಕು.
ಸೃಜನಶೀಲ ಅಭಿವ್ಯಕ್ತಿಯ ಇನ್ನೊಂದು ಹೆಸರು ಕಮಲ್. ಅಭಿನಯದಲ್ಲಿ ತನ್ನ ಮನಸ್ಸು, ದೇಹ ಎಲ್ಲವನ್ನು ತೊಡಗಿಸಿಕೊಳ್ಳುವ ಕಮಲ್ ಇಲ್ಲದ ಭಾರತೀಯ ಚಿತ್ರ ಜಗತ್ತು ನೀರಸ. ‘ನಾಯಗನ್’ ಚಿತ್ರದ ಕಮಲ್ ಮೂಲಕ ಇಂದಿಗೂ ಧಾರಾವಿಯ ವರದರಾಜ ಮೊದಲಿಯಾರ್ ನಮ್ಮ ಏದುಸಿರುಗಳಲ್ಲಿ ಒಂದಾಗಿದ್ದಾರೆ. ಯಾವುದೇ ಪಾತ್ರ, ವಸ್ತುವನ್ನು ಬ್ಲಾಕ್ ಆ್ಯಂಡ್ ವೈಟ್‌ನಲ್ಲಿ ಕಮಲ್ ನೋಡಿದ್ದು ಕಡಿಮೆ. ಆದರೆ ಕೆಲವು ಚಿತ್ರಗಳಲ್ಲಿ ಕಮಲ್ ಬೇಕು ಬೇಕೆಂದೇ ಎಡವಿ ಬೀಳುತ್ತಾರೆ. ಯಾಕೆ? ಕಮಲ್ ಅವರ ಆಳದಲ್ಲಿ ವಿಲಗುಟ್ಟುವ ಯಾವ ಗಾಯ ಅವರನ್ನು ಅವರಿಗರಿವಿಲ್ಲದೆ ಇಂತಹ ತಪ್ಪುಗಳನ್ನು ಮಾಡಿಸುತ್ತದೆ?
‘ದಶಾವತಾರಂ’ ಚಿತ್ರ ನಿಮಗೆ ನೆನಪಿರಬಹುದು. ಅದರ ಮೊದಲ ಅಧ್ಯಾಯ ತೆರೆದುಕೊಳ್ಳುವುದು ಕಮಲ್‌ನ ಇಂತಹ ತಪ್ಪಿನ ಮೂಲಕವೇ. ಚೋಳರ ಕಾಲದಲ್ಲಿ ತಮಿಳುನಾಡಲ್ಲಿ ಶೈವ- ವೈಷ್ಣವರ ನಡುವಿನ ಸಂಘರ್ಷವನ್ನು ಅದು ತೋರಿಸುತ್ತದೆ. ಅಲ್ಲಿಯೂ ಅವರು ವಿಶ್ವರೂಪಂನ ತಪ್ಪುಗಳನ್ನೇ ಮಾಡುತ್ತಾರೆ. ಶೈವರನ್ನು ಖಳನಾಯಕ ರಾಗಿ, ಕ್ರೌರ್ಯ ಮೈವೆತ್ತ ರಾಕ್ಷಸರರಾಗಿ ಬಿಂಬಿಸಿ ದರೆ, ವೈಷ್ಣವರನ್ನು ದಮನಿತ ಅಮಾಯಕರಂತೆ ತೋರಿಸುತ್ತಾರೆ. ಶೈವರ ಪಾತ್ರಗಳು ಅಲ್ಲಿ ವಿಕಾರ ವಾಗಿವೆ. ಅದು ಮೂರ್ತವಾಗಿಯೂ, ಅಮೂರ್ತ ವಾಗಿಯೂ. ಶೈವರು ವಿಷ್ಣು ಭಕ್ತನನ್ನು ಕಡಲಿಗೆಸೆಯುವ ಆ ದೃಶ್ಯ ಸಾಕಷ್ಟು ವಿವಾದಕ್ಕೆಡೆ ಮಾಡಿತ್ತು. ಪೆರಿಯಾರ್‌ನ ಕುರಿತಂತೆಯೂ ಸಣ್ಣದೊಂದು ಅಸಮಾಧಾನ ಚಿತ್ರದಲ್ಲಿ ಮಿಸುಕಾಡುತ್ತಿತ್ತು. ಕಮಲ್‌ನ ತಂದೆ ಶ್ರೀನಿವಾಸನ್ ಕಾಲಘಟ್ಟದಲ್ಲಿ ಮತ್ತು ತದನಂತರದ ದಿನಗಳಲ್ಲ್ಲಿ ತಮಿಳುನಾಡಿನಲ್ಲಿ ಬ್ರಾಹ್ಮಣರು ಎದುರಿಸಿದ ದ್ರಾವಿಡ ಚಳವಳಿ, ಪೆರಿಯಾರ್ ಚಿಂತನೆಗಳು ಪರೋಕ್ಷವಾಗಿ ಆ ಚಿತ್ರದಲ್ಲಿ ತನ್ನ ಪರಿಣಾಮವನ್ನು ಬೀರಿರುವುದರಲ್ಲಿ ಯಾವ ಸಂಶಯವೂ ಇಲ್ಲ. ದ್ರಾವಿಡ ಚಳವಳಿಯ ಬಲಿಪಶುಗಳಲ್ಲಿ ಕಮಲ್ ಹಾಸನ್‌ನ ತಂದೆಯೂ ಒಬ್ಬರು. ಸ್ವಾತಂತ್ರ ಹೋರಾಟದ ಸಂದರ್ಭದಲ್ಲಿ ಬ್ರಾಹ್ಮಣ ವಿರೋಧಿ ಚಳವಳಿಯೂ ತಮಿಳುನಾಡಿನಲ್ಲಿ ತಲೆಯೆತ್ತಿತ್ತು. ಈ ಸಂದರ್ಭದಲ್ಲಿ ಕಮಲ್‌ನ ತಂದೆ, ಸಂಬಂಧಿಕರೂ ಇದರ ಪರಿಣಾಮವನ್ನು ಅನುಭವಿಸಬೇಕಾಗಿತ್ತು. ಸ್ವಾತಂತ್ರ ಹೋರಾಟದ ಸಂದರ್ಭದಲ್ಲಿ ಕಮಲ್‌ನ ತಂದೆ ಶ್ರೀನಿವಾಸನ್ ಜೈಲು ಸೇರಿದಾಗ ಅಲ್ಲಿ ಬ್ರಾಹ್ಮಣ ವಿರೋಧಿ ಗಳಿಂದ ಅವರ ಮೇಲೆ ಹಲ್ಲೆಯೂ ನಡೆದಿತ್ತು. ಆ ಸಂದರ್ಭದಲ್ಲಿ ಶ್ರೀನಿವಾಸನ್ ಅವರ ಗೆಳೆಯ, ಮುಸ್ಲಿಮ್ ಸ್ವಾತಂತ್ರ ಹೋರಾಟಗಾರ ಯಾಕೂಬ್ ಹಸನ್ ಅವರು ಶ್ರೀನಿವಾಸನ್‌ರನ್ನು ಕಾಪಾಡಿದ್ದರು. ಈ ಕಾರಣದಿಂದಲೇ ಶ್ರೀನಿವಾಸನ್ ತನ್ನ ಮೂರು ಮಕ್ಕಳ ಹೆಸರಿನ ಹೊತೆಯೂ ಗೆಳೆಯನ ಸ್ಮರಣಾರ್ಥ ಹಸನ್ ಎಂಬ ಹೆಸರನ್ನೂ ಇಟ್ಟರು. ಇದು ಕಮಲ್ ಅವರೇ ಟಿವಿ ಮುಂದೆ ಹೇಳಿದ ಕತೆ.
 
ತಂದೆಯ ಬದುಕಿನಲ್ಲಾದ ಗಾಯ ಕಮಲ್ ಮೇಲೆ ಪರಿಣಾಮ ಬಿರಿರಬಹುದೆ? ಅದು ಆಳದಲ್ಲಿ ಮುಲುಗುಟ್ಟುತ್ತಿರುವುದರಿಂದಲೇ ದಶಾವತಾರಂ ಚಿತ್ರದಲ್ಲಿ ಅವರಿಂದ ಅಂತಹದೊಂದು ದೃಶ್ಯ ಹೊರ ಬರುವುದಕ್ಕೆ ಕಾರಣವಾಗಿರಬಹುದೆ? ದ್ರಾವಿಡ ಚಳವಳಿಯ ಕುರಿತ ಸಿಟ್ಟು, ಆಕ್ರೋಶಗಳೇ ಶೈವ ಪಾತ್ರಗಳು ಅಷ್ಟು ಭೀಕರವಾಗಿ ಅವರಲ್ಲಿ ಪ್ರತಿರೂಪ ಪಡೆದಿರಬಹುದೆ? ವಿಶ್ವರೂಪಂನ್ನೇ ತೆಗೆದು ಕೊಳ್ಳೋಣ. ಇದೊಂದು ಅಪ್ಪಟ ಕಮರ್ಶಿಯಲ್ ಚಿತ್ರ. ಕಮರ್ಶಿಯಲ್ ಚಿತ್ರವೆನ್ನುವಾಗ ಅಭಿವ್ಯಕ್ತಿ ಸ್ವಾತಂತ್ರದ ಮಾತು ತನ್ನದೇ ಆದ ಸೀಮಿತ ಚೌಕಟ್ಟನ್ನು ಪಡೆದುಕೊಳ್ಳುತ್ತದೆ. ಒಬ್ಬ ತನ್ನ ಕಮರ್ಶಿಯಲ್ ಚಿತ್ರವನ್ನು ಯಶಸ್ವಿಗೊಳಿಸಲು ಬೇಕಾಬಿಟ್ಟಿಯಾಗಿ ಅಶ್ಲೀಲ ದೃಶ್ಯಗಳನ್ನು ಹಾಕುವುದು ಹೇಗೆ ಅಭಿವ್ಯಕ್ತಿ ಸ್ವಾತಂತ್ರದ ವ್ಯಾಪ್ತಿಯಲ್ಲಿ ಬರುವುದಿಲ್ಲವೋ ಹಾಗೆಯೇ, ವಿವಾದ ಮಾಡುವುದಕ್ಕಾಗಿಯೇ ಕೆಲವೊಮ್ಮೆ ಹಿಂಸೆ, ಕ್ರೌರ್ಯ, ವಿದ್ವೇಷಗಳನ್ನು ತುರುಕುವುದೂ ಅಭಿವ್ಯಕ್ತಿ ಸ್ವಾತಂತ್ರದ ವ್ಯಾಪ್ತಿಯಲ್ಲಿ ಬರುವುದಿಲ್ಲ. ವಿಶ್ವರೂಪಂನಲ್ಲಿ ಕ್ರೌರ್ಯದ ಪರಮಾವಧಿಯನ್ನು ತೋರಿಸಲು ತನ್ನ ಸೃಜನಶೀಲತೆಯನ್ನು ಸಾಕಷ್ಟು ವ್ಯಯಿಸಿದ್ದಾರೆ. ಚಿತ್ರ ಇಸ್ಲಾಮ್‌ನ ಕುರಿತಂತೆ ಯಾವ ಧೋರಣೆಯನ್ನೂ ಹೊಂದಿಲ್ಲ. ಆದರೆ, ಅಮೆರಿಕದ ಭಯೋತ್ಪಾದಕ ವಿರೋಧಿ ಹೋರಾಟಕ್ಕೆ ತನ್ನದೇ ಆದ ಶಹಬಾಷ್‌ಗಿರಿಯನ್ನು ನೀಡಲು ಪ್ರಯತ್ನಿಸುತ್ತದೆ. ಅಫ್ಘಾನಿಸ್ತಾನ ಸೇರಿ ದಂತೆ ಜಾಗತಿಕವಾಗಿ ಮುಸ್ಲಿಮ್ ರಾಷ್ಟ್ರಗಳ ಮೇಲೆ ನಡೆಯುತ್ತಿರುವ ಅನ್ಯಾಯವನ್ನು ‘ಸರಿ’ ಎಂದು ಹೇಳಲು ಪ್ರಯತ್ನಿಸುತ್ತಿದೆ.
ವಿಶ್ವ ಭಯೋತ್ಪಾದನೆಯ ಹೆಸರಿನಲ್ಲಿ ನಡೆಯು ತ್ತಿರುವ ಅಘ್ಘಾನಿಸ್ತಾನ, ಇರಾಕ್‌ನಂತಹ ರಾಷ್ಟ್ರಗಳ ದಮನವನ್ನು ಇಷ್ಟು ಸರಳವಾಗಿ ಕಮಲ್ ಚಿಂತಿಸಿದ್ದಾರೆ ಎನ್ನುವುದು ಮಾತ್ರ ಅವರ ಸೃಜನ ಶೀಲ ವ್ಯಕ್ತಿತ್ವಕ್ಕೆ ಭಾರೀ ಅವಮಾನವೇ ಸರಿ. ಅಮೆರಿಕ ಭಾರತವನ್ನು ತನ್ನ ಚೇಲಾ ರಾಷ್ಟ್ರವಾಗಿ ಸಲು ಇಚ್ಛೆ ಪಡುತ್ತಿರುವ ದಿನಗಳಲ್ಲಿ, ಕಮಲ್ ಮೂಲಕ ಅಮೆರಿಕವೇ ಇಂತಹದೊಂದು ಸಿನೆಮಾವನ್ನು ಭಾರತಕ್ಕೆ ಬಡಿಸಿದೆ ಎಂದರೆ ಅದರಲ್ಲಿ ಅಚ್ಚರಿ ಪಡಬೇಕಾದುದೇನೂ ಇಲ್ಲ. ಮಾತು ಮಾತಿಗೆ ವಿಶ್ವರೂಪಂ ಎನ್ನುವ ತನ್ನ ಕಮರ್ಶಿಯಲ್ ಚಿತ್ರದ ಕುರಿತಂತೆ ಹುತಾತ್ಮ ಹೇಳಿಕೆಯನ್ನು ನೀಡುತ್ತಿರುವ ಕಮಲ್ ಅವರ ಭಾರತ ತ್ಯಜಿಸುವ ಮಾತು ತೀರಾ ಆಕಸ್ಮಿಕ ವೇನೂ ಅಲ್ಲ. ಬಾಲಿವುಡ್‌ನ್ನು ಬಿಟ್ಟು ಹಾಲಿವುಡ್‌ಗೆ ತೆರಳುವ ಅವರ ಕನಸಿಗೆ ನಿಧಾನಕ್ಕೆ ರೆಕ್ಕೆ ಬಂದಂತಿದೆ. ಹಾಲಿವುಡ್‌ನಲ್ಲಿ ತೊಡಗಿಸಿ ಕೊಳ್ಳುವ ಅವರ ಆಸೆಯ ಭಾಗವಾಗಿ, ಈಗಾಗಲೇ ನಿರ್ಮಾಪಕ ಬೇರಿ ಎಮ್. ಓಸ್‌ಬೋರ್ನ್(ಲಾರ್ಡ್ ಆಫ್ ದಿ ರಿಂಗ್ಸ್) ಕಮಲ್ ಜೊತೆಗೆ ಹೊಸ ಚಿತ್ರ ಮಾಡುವ ಕುರಿತಂತೆ ಮಾತುಕತೆ ನಡೆಸಿದ್ದಾರೆ. ಹಾಲಿವುಡ್‌ನಲ್ಲಿ ತೊಡಗಿ ಕೊಳ್ಳುವ ಉದ್ದೇಶದಿಂದಲೇ, ಆಂಗ್‌ಲೀ ಯಂತಹ ನಿರ್ದೇಶಕರೂ ಕಮಲ್ ಜೊತೆಗೆ ಈಗಾಗಲೇ ಕೈ ಜೋಡಿಸಿದ್ದಾರೆ. ಇದೆಲ್ಲದರ ಅರ್ಥ, ಭಾರತವನ್ನು ಬಿಡಲು ವರ್ಷಗಳ ಹಿಂದೆಯೇ ಕಮಲ್ ನಿರ್ಧರಿಸಿದ್ದಾರೆ ಮತ್ತು ವಿಶ್ವರೂಪಂ ಚಿತ್ರದ ಮೂಲಕ ಅದಕ್ಕೊಂದು ವಾತಾವರಣವನ್ನು, ವೇದಿಕೆಯನ್ನು ನಿರ್ಮಿಸಿದ್ದಾರೆ ಎಂದು.
ಈ ಚಿತ್ರ ವಿವಾದವಾಗುವುದು ಕಮಲ್‌ಗೂ, ಕಮಲ್‌ನ ಹಿಂದಿರುವ ಅಮೆರಿಕ ಹಿತಾಸಕ್ತಿಗಳಿಗೆ ಅತ್ಯಗತ್ಯ ವಾಗಿತ್ತು. ವಿವಾದ ಮಾಡುವ ಸಂಘಟನೆಯೆಡೆಗೆ ಬೆರಳು ತೋರಿಸಿ ‘ನಾವು ಹೇಳಿದ್ದು ಸತ್ಯ, ನೋಡಿ’ ಎಂದು ತಮ್ಮ ಚಿತ್ರಕ್ಕೆ ಸಮರ್ಥನೆಯನ್ನು ನೀಡುವುದು ಅವರ ಉದ್ದೇಶ. ಅದಕ್ಕಾಗಿ ಕೃತಕ ವಿವಾದವೊಂದನ್ನು ಸೃಷ್ಟಿಸಲಾ ಯಿತು ಎನ್ನಬಹುದು.
     

ಈ ಚಿತ್ರದ ಮೊದಲ ಗುರಿಯೇ ಅಮೆರಿಕದ ಭಯೋತ್ಪಾದನಾ ವಿರೋಧಿ ಯುದ್ಧಕ್ಕೆ ಪರವಾಗಿರುವ ವಾತಾವರಣವನ್ನು ರೂಪಿಸುವುದು. ಹಾಲಿವುಡ್ ಹಿತಾಸಕ್ತಿಗಳು ಕಮಲ್‌ನಂತಹ ಸೃಜನಶೀಲ ಕಲಾವಿದನನ್ನೇ ಇದಕ್ಕಾಗಿ ಬಳಸಿ ಕೊಂಡಿದೆ. ಹಾಗೆಯೇ, ಕೃತಕ ವಿವಾದದ ನಿರ್ದೇಶನದ ಹೊಣೆಯನ್ನು ತಮಿಳುನಾಡಿನ ಜಯಲಲಿತಾ ಹೊತ್ತು ಕೊಂಡರು. ಡಿಟಿಎಚ್‌ನಿಂದ ಈ ವಿವಾದ ಆರಂಭವಾಯಿತು. ಪ್ರಸಾರ ಹಕ್ಕು ಜಯಲಲಿತಾ ಟಿವಿಗೆ ಸಿಗದೇ ವಿಜಯ್ ಟಿವಿಗೆ ಸಿಕ್ಕಿದಾಕ್ಷಣ, ಜಯಲಲಿತಾ ಹೊರಾಂಗಣ ಚಿತ್ರೀಕರಣವನ್ನು ಆರಂಭಿಸಿದರು. ಭಾರತದ ಶೇ. 00.1ರಷ್ಟಿರುವ ಮುಸ್ಲಿವರ ಒಂದು ಗುಂಪನ್ನು ಬಳಸಿಕೊಂಡು ಜಯಲಲಿತಾ ಪ್ರತಿಭಟನೆಯನ್ನು ಹಮ್ಮಿ ಕೊಂಡರು. ಭಾರತದ ಮುಸ್ಲಿಮರು ವಿಶ್ವರೂಪಂನ್ನು ಪ್ರತಿಭಟಿಸುತ್ತಿದ್ದಾರೆ ಎಂಬಂತಹ ವಾತಾವರಣವನ್ನು ಮಾಧ್ಯಮಗಳು ಮುಖಪುಟ ದಲ್ಲಿ ಪ್ರಕಟಿಸಿದವು. ಈ ಮೂಲಕ ಒಂದು ಸಾಮಾನ್ಯದಲ್ಲಿ ಸಾಮಾನ್ಯವಾಗಿರುವ ಸಿನೆಮಾ (ತಂತ್ರಜ್ಞಾನ ಹೊರತು ಪಡಿಸಿ)ವನ್ನು ಅಭಿವ್ಯಕ್ತಿಯ ಸೋಲು-ಗೆಲುವುಗಳ ಮಾನದಂಡ ಗಳನ್ನಿಟ್ಟು ವಿಶ್ಲೇಷಣೆ ನಡೆಸಿತು. ಅಭಿವ್ಯಕ್ತಿಯ ದಮನ ಎಂದಾಗ ಮುಸ್ಲಿಮ್ ಮತಾಂಧತೆ ಚರ್ಚೆಗೆ ಬರಲೇಬೇಕಲ್ಲ? ಮುಸ್ಲಿಮರ ಮತಾಂಧತೆ ಮತ್ತೊಮ್ಮೆ ಸುದ್ದಿಗೆ ಬಂದವು. ಕಮಲ್ ‘ನಾನು ನಷ್ಟದಿಂದ ಸರ್ವನಾಶವಾಗು ತ್ತೇನೆ...ದೇಶ ಬಿಡುತ್ತೇನೆ’’ ಎಂದು ಅಲವತ್ತು ಕೊಂಡರು. ಮಾಧ್ಯಮಗಳು ಕಂಗಾಲಾದವು. ಕಮಲ್ ಸರ್ವನಾಶವಾಗುವಷ್ಟು ದಡ್ಡನಂತೂ ಅಲ್ಲವೇ ಅಲ್ಲ. ಯಾಕೆಂದರೆ, ಕಮಲ್ ಸರ್ವನಾಶವಾಗಬೇಕಾದರೆ ದಶಾವತಾರಂನಲ್ಲೇ ಆಗಬೇಕಾಗಿತ್ತು. ಚಿತ್ರಮಂದಿರಗಳಿಂದ ಒಂದೇ ವಾರದಲ್ಲಿ ಎತ್ತಂಗಡಿಯಾದ ಹಲವು ಚಿತ್ರಗಳನ್ನು ಪಟ್ಟಿ ಮಾಡಬಹುದಾಗಿದೆ. ಅವರು ಮತ್ತೆ ಮತ್ತೆ ಎದ್ದು ಬಂದಿದ್ದಾರೆ.

ಕಮಲ್ ಶೀಘ್ರವೇ ತನ್ನ ಮೆಚ್ಚಿನ ಹಾಲಿವುಡ್‌ನ ಜೊತೆಗೂಡುವ ದಿನ ಹತ್ತಿರವಾಗಲಿದೆ ಎನ್ನುವುದರ ಸಂಕೇತವೇ ಕಮಲ್ ಅವರ ವಿಶ್ವ ವಿರೂಪಂ.
ಕಮಲ್ ‘ವಿಶ್ವರೂಪಂ’ನಲ್ಲಿ ಭಾರತೀಯ, ದೇಶಭಕ್ತ ಮುಸಲ್ಮಾನನಾಗಿ ನಟಿಸಿದ್ದಾರೆ. ನಾನು ಭಾರತೀಯ ಮುಸ್ಲಿಮರನ್ನು ಕೆಟ್ಟದಾಗಿ ಬಿಂಬಿಸಿಲ್ಲ ಎಂದಿದ್ದಾರೆ. ಕಮಲ್‌ನ ಪ್ರಕಾರ ಭಾರತೀಯ ಮುಸ್ಲಿಮರು ಒಳ್ಳೆಯವರಾಗಿ ಗುರುತಿಸಲ್ಪಡಬೇಕಾದರೆ ಒಂದೋ ಕಥಕ್ ಕಲಿಯಬೇಕು. ಇಲ್ಲವೇ ರಾ ಏಜಂಟ್ ಆಗಬೇಕು. ಇದರ ಜೊತೆ ಜೊತೆಗೆ ನಮಾಝ್ ಮಾಡಿದರೆ ಅದು ಸಹಿಸಲಾರ್ಹ.
‘ದಿ ಬೀಸ್ಟ್’
ಚಿತ್ರವನ್ನು ನೀವೂ ನೋಡಿರಬಹುದು. 80ರ ದಶಕದಲ್ಲಿ ಅಫ್ಘಾನಿಸ್ತಾನದ ಫಶ್ತೂನ್ ಗ್ರಾಮದಲ್ಲಿ ರಶ್ಯನ್ನರ ಜೊತೆಗೆ ಹೋರಾಟ ನಡೆಸಿದ ಯುವ ಮುಜಾಹಿದೀನ್‌ಗಳ ಹೃದಯವಿದ್ರಾವಕ ಕತೆ ಅದು. ಈ ಚಿತ್ರ ಹೊರ ಬಂದುದು 1988ರಲ್ಲಿ. ಚಿತ್ರವನ್ನು ನಿರ್ದೇಶಿಸಿದವರು ಕೆವಿನ್ ರೆನಾಲ್ಡ್ಸ್.(ರಾಬಿನ್ ಹುಡ್, ವಾಟರ್‌ವರ್ಲ್ಡ್‌ನಂತಹ ಅದ್ಭುತ ಚಿತ್ರಗಳನ್ನು ಈತ ನಿರ್ದೇಶಿಸಿದ್ದಾರೆ). ‘ದಿ ಬೀಸ್ಟ್’ ಚಿತ್ರ ಒಂದು ರಷ್ಯನ್ನರ ಟ್ಯಾಂಕರ್‌ನ್ನು ಹೊಡೆದುರುಳಿಸಲು ಅಫ್ಘಾನಿಸ್ತಾನದ ಫಶ್ತೂನರು ನಡೆಸುವ ಹೃದಯವಿದ್ರಾವಕ ಕಥೆ. ಬರೇ ಒಂದು ಕೋವಿಯಂತಹ ದುರ್ಬಲ ಆಯುಧವನ್ನು ಇಟ್ಟುಕೊಂಡು, ಮುಜಾಹಿದೀನ್‌ಗಳ ಯುವ ನಾಯಕ ತನ್ನ ತಂಡದೊಂದಿಗೆ ಗೆರಿಲ್ಲಾ ಯುದ್ಧದ ಮೂಲಕ ರಶ್ಯನ್ನರ ಟ್ಯಾಂಕ್‌ನ್ನು ಎದುರಿಸುತ್ತಾನೆ. ಟ್ಯಾಂಕರ್ ಅಫ್ಘಾನ್‌ನ್ನು ಕ್ರೂರವಾಗಿ ಧ್ವಂಸ ಮಾಡುತ್ತಿರುವಾಗ, ಆ ಟ್ಯಾಂಕರ್‌ನಲ್ಲಿದ್ದ ಒಬ್ಬ ಯೋಧ ಅದನ್ನು ಪ್ರತಿಭಟಿಸುತ್ತಾನೆ. ಮಾತ್ರವಲ್ಲ, ಅಲ್ಲಿಂದ ಹೊರ ಹೋಗಿ ಮುಜಾಹಿದೀನ್‌ಗಳ ಜೊತೆ ನಿಂತು ರಷ್ಯನ್ ಸೈನಿಕರ ವಿರುದ್ಧ ಹೋರಾಡುತ್ತಾನೆ.
ಅಫ್ಘಾನಿಸ್ತಾನದ ಬರ್ಬರ ಸ್ಥಿತಿಯನ್ನು, ದುರಂತವನ್ನು, ಸೈನಿಕರ ಕ್ರೌರ್ಯವನ್ನು ಹೃದಯದ ಕಣ್ಣಿನ ಮೂಲಕ ನೋಡಿ ‘ದಿ ಬೀಸ್ಟ್’ ಚಿತ್ರವನ್ನು ಕೆವಿನ್ ನಿರ್ದೇಶಿಸಿದ್ದಾನೆ. ಅಫ್ಘಾನಿಸ್ತಾನದ ಹೃದಯವನ್ನು ಯುದ್ಧವೆನ್ನುವ ಮಾರಿ ಹೇಗೆ ಕೊರೆದು ಹಾಕುತ್ತಿದೆ ಎನ್ನುವುದನ್ನು ಈ ಚಿತ್ರ ಹೃದಯಂಗಮವಾಗಿ ಕಟ್ಟಿಕೊಡುತ್ತದೆ. ಒಂದಾನೊಂದು ಕಾಲದಲ್ಲಿ ಅಮೆರಿಕವೆನ್ನುವ ಅಮೆರಿಕವೇ ತಾಲಿಬಾನ್‌ಗಳನ್ನು ಸ್ವಾತಂತ್ರ ಯೋಧರು ಎಂದು ಕರೆದಿತ್ತು. ಯಾಕೆಂದರೆ ತಾಲಿಬಾನರನ್ನು ಸೃಷ್ಟಿಸಿದ್ದೇ ಅಮೆರಿಕ. ರಷ್ಯನ್ನರ ವಿರುದ್ಧ ಅಫ್ಘಾನಿಸ್ತಾನ ಹೋರಾಟ ನಡೆಸಿದಾಗ ಅದನ್ನು ಮೆಚ್ಚಿದ ಅಮೆರಿಕವೇ ಇಂದು ವಿಶ್ವರೂಪಂನಲ್ಲಿ, ತನ್ನ ವಿರುದ್ಧದ ಅಫ್ಘಾನಿಗಳ ಹೋರಾಟವನ್ನು ಭಯೋತ್ಪಾದಕರ ಕ್ರೌರ್ಯವಾಗಿ ಬಿಂಬಿಸಿದೆ. ಪರೋಕ್ಷವಾಗಿ ಅದಕ್ಕೆ ಇಸ್ಲಾಮನ್ನು ಹೊಣೆ ಮಾಡಿದೆ. ತಾನು ಮಾತ್ರ ಸಂಪೂರ್ಣ ಹೊಣೆ ಮುಕ್ತನಾಗಿದೆ.
ದಿ ಬೀಸ್ಟ್ ಚಿತ್ರವನ್ನು ನೋಡಿದ ಬಳಿಕ ನೀವು ‘ವಿಶ್ವರೂಪಂ’ನ್ನು ನೋಡಿದರೆ ಕಮಲ್ ಹಾಸ್ಯಕ್ಕೂ, ಅನುಕಂಪಕ್ಕೂ ಯೋಗ್ಯರಾಗುತ್ತಾರೆ.
                                                                                                       
                                                                                
                                                                           

No comments:

Post a Comment